Bun da savair
Qua chattais Vus ulteriuras infurmaziuns utilas davart differentas dumondas.
Pertge èsi impurtant da metter in fundament cuminaivel en la lavur voluntara cun fugitivas e fugitivs?
Mintga uman ch’è fugì da guerra, persecuziun e terror e che tschertga refugi en Svizra sa raquintar in’autra istorgia da sia vita e sia fugia. Mintgin da quests umans ha er auters basegns ed autras motivaziuns. En la lavur da sustegn da e cun persunas fugidas poi magari dar irritaziuns pervia da malchapientschas e spetgas divergentas. In fundament cuminaivel po reducir situaziuns difficilas durant la lavur voluntara. Gist a l’entschatta dal contact èsi impurtant da prender bler temp per emprender d’enconuscher in l’auter, da tadlar bain e da stabilir confidenza. En pli gidi da tschentar avertamain dumondas a la persuna visavi e da s’occupar da la motivaziun persunala e da las atgnas ideas ed aspectativas. Quai dat ina buna basa per l’engaschament voluntar.
Il video da reflexiun ed il text accumpagnant dal Netzwerk Rassismuskritische Migrationspädagogik Baden-Württemberg dat impuls per reflectar l’atgna tenuta, presupposiziuns e stereotipisaziuns culturalas e per sa fatschentar cun dumondas sco:
-
Pertge vi jau gidar?
-
Ves jau l’uman u mo la persuna fugida?
-
Dastga la fugitiva u il fugitiv dir «na»?
-
Èn mias dumondas memia persunalas?
-
Co vom jau enturn cun mes agens cunfins?
-
Co fatsch jau part da relaziuns da pussanza?
video da reflexiun e text accumpagnant: Unterstützungsarbeit - auf Augenhöhe mit Geflüchteten?!
www.rassismuskritik-bw.de
Pertge èn las cumpetenzas interculturalas nizzaivlas?
La lavur voluntara cun fugitivas e fugitivs signifitga che persunas da differentas culturas interageschan e communitgeschan ina cun l’autra. Per pudair agir a moda adequata en il contact cun persunas fugidas ston ins d’ina vart avair empatia e pudair reflectar, observar e tadlar, da l’autra vart dovri enconuschientschas da la lingua, da l’istorgia, da las valurs e da las tradiziuns. Ultra da quai è impurtanta ina tenuta caracterisada d’avertadad, da stima e da respect. L’acquist da cumpetenzas interculturalas succeda per exempel cun frequentar curs e trenaments correspundents, cun leger cudeschs spezialisads u contribuziuns en l’internet sco era cun emprender in da l’auter ed in cun l’auter en il mintgadi. En il Grischun vivan umans da var 120 pajais. Pia porta mintga di situaziuns cun differentas culturas che sa cruschan ed uschia datti numerusas chaschuns d’emprender cuminaivlamain bler nov.
Nua poss jau ma drizzar, sche jau vegn a mes cunfins durant la lavur voluntara cun fugitivas e fugitivs?
La lavur voluntara cun fugitivas e fugitivs po confruntar Vus cun temas multifars, dumondas existenzialas e miseria umana, per exempel experientschas da fugia traumaticas, famiglias separadas, malsognas, in status da dimora intschert u ina situaziun d’abitar precara.
Tar Vus po quai chaschunar ina profunda consternaziun ed in grond malesser. Faschai attenziun da Voss equiliber psichic e corporal e discurri cun persunas da confidenza. Sche Vus faschais in servetsch voluntar via in’organisaziun, pudais Vus As drizzar a la persuna da contact responsabla.
Il team dal Post spezialisà per l'integraziun As stat er a disposiziun. Contactai nus per telefon 081 257 26 38 u per e-mail ad info@integration.gr.ch.