Furmaziun e lavur
Las voluntarias ed ils voluntaris pon surpigliar incumbensas impurtantas en connex cun l’integraziun professiunala da fugitivas e fugitivs: accumpagnar e sustegnair l’emprender durant in emprendissadi, intermediar infurmaziuns davart il martgà da lavur u gidar activamain da chattar ina plazza. Nua che Vus pudais As drizzar en cas da dumondas davart la promoziun da l’integraziun linguistica e professiunala, nua ch’i dat infurmaziuns plurilinguas davart il sistem da furmaziun - quai ed anc bler dapli vegnis Vus a savair qua.
Nua chat jau infurmaziuns davart la promoziun da l’integraziun linguistica e professiunala?
Sut la rubrica «Fugitivas e fugitivs» datti ina survista davart dumondas e respostas impurtantas areguard la promoziun da l’integraziun linguistica e professiunala. En cas da dumondas pudais Vus gugent As drizzar a nus per telefon 081 257 26 38 u per e-mail ad info@integration.gr.ch.
Nua datti infurmaziuns plurilinguas davart il sistem da furmaziun, las pussaivladads da far ina carriera professiunala ed ils tips da scolaziun e perfecziunament en Svizra?
Die Internetseite berufsberatung.ch bietet verschiedene Merkblätter zu wichtigen Fragen der schulischen und beruflichen Bildung. Diese sind in 13 Sprachen verfügbar.
Tge èn las premissas per pudair absolver ina furmaziun da basa professiunala?
Mintg’onn cumenza en il Grischun in dumber pli grond da fugitivas e fugitivs ina furmaziun da basa professiunala. In pèr exempels da professiuns emprendidas: assistenta da sanadad e fatgs socials (AFP), constructur da metal (AFP), dissegnadra d’architectura (AFQ) ed elavuratur da medias stampadas (AFQ).
Las premissas las pli impurtantas:
-
tudestg nivel B1, tut tenor il champ da professiun B2 (examens Telc passads a bucca ed en scrit)
- bunas enconuschientschas da matematica
- emprender autonom e strategias d’emprender
- la voluntad da s’engaschar cumplainamain per la scolaziun
- prontezza da sa sviluppar persunalmain e linguisticamain
- 100% disponibladad (temp parzial betg pussaivel)
- prontezza da s’obligar durant 2 fin 4 onns e da viver durant quest temp da prestaziuns da provediment (la paja d’emprendissadi na cuvra betg ils custs da viver)
Ina furmaziun da basa AFP u AFQ è mo pussaivla en cas da bunas premissas scolasticas e linguisticas, d’in grond engaschament e dal consentiment d’in manaschi d’emprendissadi.
Jau vuless gidar ina persuna fugida da tschertgar ina plazza. Nua chat jau tips nizzaivels?
La pagina-web cussegliaziun.ch porscha numerusas infurmaziuns davart il martgà da plazzas liber e zuppà ed il dossier da candidatura e dat tips e trics per il discurs da preschentaziun.