Famiglia
Nua che persunas fugidas pon s’infurmar davart las pussaivladads da reunir la famiglia, tge posts che porschan sustegn da tschertgar confamigliars sparids, nua ch’i dat infurmaziuns plurilinguas davart l’educaziun, il svilup e la sanadad dals uffants – respostas a questas ed ad ulteriuras dumondas chattais Vus qua.
Nua datti cussegls ed infurmaziuns davart la reuniun da la famiglia?
Las regulaziuns legalas en connex cun il dretg da reunir la famiglia en cas da persunas fugidas èn cumplexas en Svizra. Da princip valan per fugitivas e fugitivs renconuschids (attest B), per fugitivas e fugitivs ch’èn admess provisoricamain (attest F) e per persunas ch’èn admessas provisoricamain (attest F) differentas premissas e regulaziuns.
Il Post da cussegliaziun grischun per requirentas e requirents d’asil porscha sustegn e cussegliaziun en connex cun la reuniun da la famiglia. Tut tenor il document dal dretg d’asil vegn pretendì in onurari.
La pagina-web da l’Agid svizzer a fugitivas e fugitivs porscha ina survista dals documents dal dretg d’asil e dals dretgs da status ils pli impurtants, tranter auter quai che pertutga la reuniun da la famiglia, la midada dal chantun, la lavur, l’agid social u viadis a l’exteriur.
Il video «Familienzusammenführung in der Schweiz» da la Crusch Cotschna Svizra mussa tgi che ha tut il dretg sin la reuniun da la famiglia u tge termins da spetga ch’i dat. Il video datti en las linguas arab, dari/farsi, englais, tamil, tigrinya e tirc.
Tge posts pon gidar da tschertgar confamigliars sparids?
Tut las persunas che vivan en Svizra che tschertgan in confamigliar sparì u ina persuna intima sparida, pon sa drizzar al servetsch da tschertga da la Crusch Cotschna Svizra. Ellas vegnan cussegliadas persunalmain ed infurmadas regularmain davart il stadi da las retschertgas. Il servetsch da tschertga po vegnir contactà per telefon 058 400 43 80 u per e-mail a tracing@redcross.ch.
Nua datti infurmaziuns plurilinguas davart l’emprender dals uffants pitschens en il mintgadi?
Geniturs e persunas da referiment pon promover uffants pitschens en bleras situaziuns dal mintgadi, en las qualas lur experientschas e scuvertas e lur giugar ed emprender van in en l’auter: emplenir la maschina da lavar, far cumissiuns, spaletschar carottas en cuschina u trair en las soccas.
Co ch’ins po concepir sapientivamain situaziuns dal mintgadi da maniera che uffants pitschens pon far las experientschas talmain impurtantas per els ed uschia ch’ins promova lur svilup sensoric, motoric, social, emoziunal e cognitiv, mussan 65 films curts da la Direcziun da furmaziun dal chantun da Turitg. Ils filmins èn disponibels en 13 linguas.
Guardar ils films curts en tudestg ed en la lingua dals geniturs fugids porscha la pussaivladad da discurrer davart ils differents aspects dal svilup tempriv da l’uffant e da parter las experientschas.
Nua datti infurmaziuns plurilinguas per geniturs cun uffants tranter 0 e 16 onns davart temas d’educaziun, da furmaziun e da sanadad?
Esser genitur è oz pli pretensius che mai. Las respostas a las pli differentas dumondas chatt’ins tranter auter en broschuras, mussavias, forums en l’internet u sin apps.
L’app parentu sustegna geniturs en il mintgadi da famiglia cun impuls e savida actuala e fundada.
Las infurmaziuns èn disponiblas en albanais, arab, bosniac/croat/serb, tudestg, englais, farsi, franzos, talian, portugais, spagnol, tamil, tigrinya e tirc.
L’app parentu po vegnir telechargiada gratuitamain (App-Store, Google Play).