Sanadad
Per fugitivas e fugitivs n’èsi savens betg simpel da chattar access ad infurmaziuns da sanadad. Quai vala cunzunt per umans cun paucas enconuschientschas da la lingua locala. Nua ch’ins chatta infurmaziuns davart il tema sanadad en pliras linguas, vegnis Vus a savair qua.
Nua chat jau material d’infurmaziun pluriling davart temas da sanadad impurtants?
La plattafurma migesplus.ch porscha infurmaziuns en pliras linguas davart temas sco malsognas, la promoziun da la sanadad e la prevenziun, traumas, la sanadad psichica, la sanadad sexuala e la dependenza.
Nua chat jau infurmaziuns plurilinguas davart il sectur da sanadad da la Svizra?
Il mussavia da sanadad da la Crusch Cotschna Svizra (CCS) e da l’Uffizi federal da sanadad (UFSP) cuntegna bleras infurmaziuns nizzaivlas davart il tema sanadad en Svizra, tranter auter davart la prevenziun, la cassa da malsauns, il provediment medicinal, ils dretgs e las obligaziuns da las pazientas e dals pazients sco era davart las basas legalas. La broschura stat a disposiziun en 18 linguas.
Nua chat jau infurmaziuns davart il contact cun umans traumatisads?
Fitg bleras persunas che han stuì fugir da lur pajais d’origin da guerra, tortura u persecuziun han fatg experientschas ordvart gravantas u èn stadas expostas a situaziuns smanatschantas. Savens restan plajas en lur psica ed i po dar reacziuns engrevgiantas.
La broschura «Mehr wissen, besser verstehen, bewusster handeln» da l’Ambulatori per victimas da tortura e guerra CCS, elavurada en collavuraziun cun la Crusch Cotschna Bavaraisa, mussa co che las consequenzas d’experientschas traumaticas pon s’exprimer e co che voluntarias e voluntaris pon chattar in contact che tegna quint dal trauma da las persunas pertutgadas. La broschura stat a disposiziun gratuitamain sin la pagina-web da la plattafurma da sanadad migesplus.ch sco PDF telechargiabel.
Differentas organisaziuns porschan a persunas interessadas curs davart il tema «Fugia e trauma». Ils curs èn publitgads tranter auter sin la plattafurma infobox-migration.ch (endatar il chavazzin «trauma» el champ da tschertga).
Nua chattan las persunas pertutgadas infurmaziuns davart disturbis posttraumatics?
En la broschura «Wenn das Vergessen nicht gelingt» da la Crusch Cotschna Svizra chattan las persunas pertutgadas e lur confamigliars infurmaziuns detagliadas davart il svilup, las consequenzas e la superaziun dal disturbi posttraumatic. La broschura stat a disposiziun en pliras linguas sin la plattafurma da sanadad migesplus.ch sco PDF telechargiabel.
Nua survegnan persunas fugidas traumatisadas da tortura, guerra u fugia sustegn?
I dat differentas persunas dal fatg e differents posts da consultaziun che pon gidar las persunas pertutgadas: medias spezialisadas, psicoterapeuts, psichiatras u posts da terapia spezialisads. Tar quels ultims tutgan ils ambulatoris ch’èn s’unids a l’associaziun «Support for Torture Victims». Sin la pagina-web correspundenta chatt’ins infurmaziuns davart la terapia e la cussegliaziun.
Ils emprims posts da consultaziun èn savens ils medis da chasa, las lavurantas socialas ed ils lavurants socials sco er ils posts da cussegliaziun per l’agid a victimas.