Dumondas frequentas
Co funcziuna l'annunzia da relaziuns da lavur cun fugitivas e fugitivs u cun persunas admessas provisoricamain?
Da princip vali che fugitivas e fugitivs renconuschids ed admess provisoricamain sco er persunas estras admessas provisoricamain dastgan lavurar. I vala in'obligaziun d'annunzia simpla.
Relaziuns da lavur senza pajament (fufragnadis e praticums) vegnan annunziadas al post chantunal cumpetent tras il Post spezialisà per l'integraziun.
Per relaziuns da lavur pajadas cun fugitivas e fugitivs u cun persunas admessas provisoricamain basta in'annunzia simpla da las patrunas e dals patruns cun agid dal formular d'annunzia a:
- Uffizi da migraziun e da dretg civil dal Grischun
Partiziun Asil e return
Grabenstrasse 8
7001 Coira
E-Mail postasyl@afm.gr.ch
Il formular d'annunzia sco er respostas sin dumondas frequentas (FAQ) chattais Vus sin la pagina d'internet dal Secretariat da stadi per migraziun (SEM): www.sem.admin.ch
Per emplenir il formular d'annunzia dovrel jau il numer SIMIC da mia collavuratura/da mes collavuratur. Nua chat jau quel?
Il SIMIC (Sistem d'infurmaziun central davart la migraziun) è il register da persunas per persunas estras che vivan en Svizra u che prendan dimora qua. Il numer è notà sin il document da legitimaziun da persunas estras. En cas da dumondas po As gidar il Post spezialisà per l'integraziun.
Resta il Post spezialisà per l'integraziun er suenter avair fatg in contract da lavur / in contract d'emprendissadi nossa persuna da contact per dumondas e per giavischs?
En cas d'in contract da lavur illimità è la finamira da l'integraziun professiunala cuntanschida. Per regla n'è in ulteriur basegn da cussegliaziun e da sustegn betg pli chaussa dal Post spezialisà per l'integraziun.
Cun in contract d'emprendissadi vegn l'accumpagnament cuntinuà fin a la terminaziun da success da la scolaziun. Sche necessari vegn purschì sustegn tar la tschertga d'ina soluziun transitorica.
Tge opziuns stattan a disposiziun per la promoziun linguistica da mia collavuratura u da mes collavuratur?
Durant in praticum u durant in contract da salari parzial èsi per la fugitiva u per il fugitiv ubain per la persuna admessa provisoricamain obligatoric (criteri da contract) da sa qualifitgar vinavant tras ina participaziun a curs da lingua.
En il rom dal program da promoziun linguistic chantunal existan divers formats da curs sin differents nivels. Ils curs adattads vegnan intermediads tras il Post spezialisà per l'integraziun.
Co vesi ora cun la protecziun tras l'assicuranza durant in praticum u durant in engaschament da paja parziala?
La fugitiva u il fugitiv ubain la persuna admessa provisoricamain è assicurà cunter accident durant il praticum en il rom da l'assicuranza obligatorica per la tgira da malsauns.
Tar in engaschament da paja parziala è la lavuranta u il lavurant assicurà cumplainamain tras la patruna u tras il patrun.
Tge purschidas dal Post spezialisà per l'integraziun stattan a disposiziun a la fugitiva u al fugitiv ubain a la persuna admessa provisoricamain en vista ad ina soluziun transitorica pussaivla suenter in praticum u suenter in engaschament da paja parziala?
- Accumpagnament e cussegliaziun
- Finanziaziun da curs da qualificaziun specifics
- Visita d'ulteriurs curs da lingua
- Intermediaziun da plazzas fixas
- Intermediaziun da plazzas temporaras
Poss jau engaschar insatgi per in praticum, malgrà ch'i n'è strusch pussaivel da pudair porscher ina soluziun transitorica?
Gea, il praticum preschenta ina schanza d'entrar en il martgà da lavur svizzer e porscha a la fugitiva u al fugitiv ubain a persunas admessas provisoricamain la pussaivladad da rimnar emprimas experientschas da lavur en il martgà da lavur real. Impurtant èsi che la fugitiva u il fugitiv ubain la persuna admessa provisoricamain haja dapi il cumenzament enconuschientscha dal fatg e ch'i po pia vegnir fatga vicendaivlamain ina cunvegna clera.
Tge incumbensas èn chaussa dal Post spezialisà per l'integraziun en il rom da l'accumpagnament da mia collavuratura u da mes collavuratur e tgeninas dal Servetsch social regiunal?
Il Post spezialisà per l'integraziun è responsabel per las mesiras da l'emprima integraziun da fugitivas e fugitivs renconuschids (legitimaziun B) e da fugitivas e fugitivs admess provisoricamain (legitimaziun F) fin tschintg onns suenter l'entrada en Svizra, da persunas admessas provisoricamain (legitimaziun F) fin set onns suenter l'entrada en Svizra. Las mesiras da l'emprima integraziun cumpiglian la promoziun en l'integraziun linguistica, sociala e professiunala.
Ils Servetschs socials regiunals porschan a fugitivas e fugitivs renconuschids (legitimaziun B) ed a fugitivas e fugitivs admess provisoricamain (legitimaziun F) ina cussegliaziun sociala persunala e sche necessari agid social finanzial.
Per la collocaziun e per l'assistenza da persunas admessas provisoricamain (legitimaziun F) è responsabel l'Uffizi da migraziun e da dretg civil (Partiziun Asil e return).
Quant sto mia collavuratura u mes collavuratur gudagnar, per ch'ella u ch'el daventia independent(a) da l'agid social tras ils Servetschs socials regiunals u tras l'Uffizi da migraziun e da dretg civil?
Servetschs socials regiunals (fugitivas e fugitivs renconuschids ed admess provisoricamain): in'examinaziun individuala, tut tenor la grondezza da la famiglia.
Uffizi da migraziun e da dretg civil (persunas admessas provisoricamain): examinaziun individuala.
Co po la conversiun d'ina admissiun provisorica (legitimaziun F) en ina permissiun da dimora per in onn (legitimaziun B) vegnir prendida en mira?
Persunas admessas provisoricamain han la pussaivladad d'inoltrar tar L'Uffizi da migraziun e da dretg civil ina dumonda per conceder ina permissiun per cas da direzza. Ulteriuras infurmaziuns sco er il formular da dumonda chattais Vus sut:
www.afm.gr.ch
Dastga mia collavuratura u mes collavuratur ir a l'exteriur, per exempel en cas d'excursiuns da fatschenta, per visitar confamigliaras e confamigliars, en cas d'excursiuns da la scola professiunala?
Fugitivas e fugitivs renconuschids ed admess provisoricamain pon dumandar in document da viadi per fugitivas e fugitivs tar l'Uffizi da migraziun e da dretg civil. Il document da legitimaziun vegn emess tras il Secretariat da stadi per migraziun e pussibilitescha da princip il viadi a l'exteriur sco er enavos en Svizra. I sto vegnir resguardà ch'i vala in'obligaziun da visum per intgins stadis. Plinavant na giustifitgescha il document da viadi betg d'entrar en il stadi d'origin u da derivanza. A fugitivas e fugitivs renconuschids u admess provisoricamain che viageschan en lur stadi d'origin u da derivanza, po il status da fugitiva u da fugitiv vegnir abgiuditgà.
La libertad da viagiar da persunas admessas provisoricamain è limitada. En cas motivads, per exempel greva malsogna d'ina confamigliara u d'in confamigliar, excursiuns da la scola professiunala, occurrenzas da sport e da cultura, po in document da viadi vegnir dumandà tar l'Uffizi da migraziun e da dretg civil suenter esser stà là persunalmain.
Ulteriuras infurmaziuns davart documents da viadi chattais Vus sut: www.afm.gr.ch