Vus vulais As engaschar per l'integraziun da fugitivas e fugitivs en il Grischun e porscher sustegn, per ch'els chattian lur plazza en nossa societad? Accumpagnais Vus gia ina persuna cun biografia da migraziun sin sia via en ina nova vita?

Sco persuna voluntara gidais Vus activamain a furmar nossa societad. Vus demussais solidaritad e surpigliais responsabladad per ina buna convivenza en il Grischun. Grazia a Vossa avertadad ed a Voss engaschi pon umans da differentas culturas e da differenta lingua emprender d'enconuscher in l'auter, chattar basas cuminaivlas e crear in fundament da confidenza. Uschia contribuis Vus essenzialmain a la coesiun sociala en noss Chantun.

En noss projects d'integraziun per fugitivas e fugitivs renconuschids e per persunas admessas provisoricamain s'engaschan numerusas persunas voluntaras da tuttas vegliadetgnas. En pli prestan voluntaris lavur d'integraziun preziusa en servetsch da differents purtaders privats. Bleras Grischunas e blers Grischuns gidan en lur mintgadi fugitivas e fugitivs ed avran ad els las portas da nossa societad.

Cun accumpagnar fugitivas e fugitivs poi dar dumondas en connex cun ils champs da la vita ils pli differents. Sin questa plattafurma chattais Vus bleras dumondas e respostas relevantas per l'integraziun sco er infurmaziuns supplementaras. En pli As cusseglian e sustegnan nossas collavuraturas e noss collavuraturs.

Voss team dal Post spezialisà per l'integraziun