Dumondas frequentas che voluntarias e voluntaris pon inscuntrar cun s'engaschar per fugitivas e fugitivs.
Numerusas autras dumondas e respostas areguard la vita e la lavur en il Grischun chattais Vus ultra da quai en la rubrica
«Flüchtlinge» sin la pagina tudestga.
Nua chat jau infurmaziuns davart temas quotidians impurtants?
Broschura da bainvegni chantunala
En la broschura da bainvegni dal chantun Grischun chattais Vus numerusas infurmaziuns utilas davart temas sco communicaziun, lavur, famiglia, uffants, scola, abitar, sanadad, assicuranzas, mobilitad u ambient. En pli cuntegna la broschura ina glista da purschidas da cussegliaziun e da sustegn. La broschura è disponibla en 19 linguas.
Plattafurma d'infurmaziun plurilingua hallo.gr.ch
Numerusas infurmaziuns utilas davart il mintgadi en il Grischun e davart la vita en Svizra chattais Vus era sin la pagina d'internet hallo.gr.ch. Las infurmaziuns stattan a disposiziun en albanais, arab, bosniac/croat/serb, dari/farsi, tudestg, englais, franzos, talian, portugais, rumantsch, spagnol, tamil e tigrinya.
Han mes uffants la pussaivladad da studegiar en Svizra?
Gea, quai han els, sch'els adempleschan las premissas respectivas. Cun il sistem da furmaziun en Svizra s'avran numerusas pussaivladads. Mintga pass da scolaziun maina ad ina finiziun, e quella garantescha da pudair far ulteriurs pass da scolaziun.
Co chatta mes uffant sia via tranter las differentas culturas?
Era sche l'educaziun è sumeglianta en blers secturs, tuttina nua ch'in uffant crescha si, è l'educaziun dependenta era da cundiziuns socialas e da valurs culturalas u religiusas. Uffants da migrantas e migrants ston savair s'orientar il medem mument en dus munds: en quel dals geniturs ed en Svizra. La lingua, las ideas da las valurs e las reglas da la convivenza sa differenzieschan. Quai po chaschunar conflicts: Tge ambient da viver vala uss atgnamain per mai? Uffants èn stratgs vi e nà. Els ston però emprender da s'orientar en omadus munds. Quai è ina gronda prestaziun.
Ils geniturs e la scola pon gidar els da far quai. Lur incumbensa è da sustegnair ils uffants da chattar in equiliber tranter las valurs da la Svizra e las valurs da la famiglia. Quai signifitga per ils geniturs d'acceptar las atgnadads svizras. I munta dentant era per la scola d'emprender d'acceptar il context sociocultural e famigliar dals geniturs immigrads.
Tge avantatgs ma porscha ina buna rait sociala?
Bleras e blers da nus èn colliads cun numerusas autras persunas en las medias socialas sco Facebook, Instagram u Twitter. Quella rait virtuala po esser impurtanta per differents motivs, tranter auter per tegnair il contact cun la famiglia, las amias ed ils amis en il pajais d'origin.
Per nossa vita da mintgadi essan nus dentant dependents da raits fisicas socialas cun inscunters persunals. Nus creain confidenza vicendaivla cun ans inscuntrar cun autras persunas, cun discurrer cun ellas e cun ans barattar cun ellas davart eveniments, experientschas ed opiniuns. Quai è la basa per relaziuns e raits fermas e solidas. Talas raits socialas pon esser utilas per tut las persunas participadas tant per la vita professiunala sco era privata. Ellas èn in dar ed in prender. In enconuschent As infurmescha per exempel che in'abitaziun vegnia libra e Vus giais a far cumissiuns per el, sch'el duess ina giada esser malsaun.
En pli èsi ideal dad esser entretschà cun umans cun las pli differentas biografias.
Jau hai dumondas areguard la reuniun da la famiglia. A tgi poss jau m'adressar?
Las reglamentaziuns legalas per fugitivas e fugitivs areguard il dretg per ina reuniun da la famiglia en Svizra èn cumplexas. Da princip valan per fugitivs renconuschids (permissiun B), fugitivs admess provisoricamain (permissiun F) e persunas admessas provisoricamain (permissiun F) differentas cundiziuns e regulaziuns.
Il Post da cussegliaziun grischun per requirents d'asil sustegna e cusseglia persunas pertutgadas en dumondas da la reuniun da la famiglia. Tut tenor l'attest da dretg d'asil incassescha el in onurari per ses servetschs.
Sin la pagina d'internet da l'Agid svizzer als fugitivs chattais Vus ina survista davart attests da dretg d'asil ed ils pli impurtants dretgs tenor il status sco la reuniun da la famiglia, la midada da chantun, la lavur, l'agid social u viadis a l'exteriur.
En il video explicativ davart la reuniun da la famiglia en Svizra da la Crusch Cotschna Svizra vegnis Vus a savair tgi che ha il dretg ad ina reuniun da la famiglia u tge temps da spetga che ston vegnir resguardads. Il video explicativ è disponibel en las linguas arab, dari/farsi, englais, tamil, tigrinya e tirc.
Jau na chat betg pli ina persuna che ma stat datiers. Tge servetsch ma po gidar da la tschertgar?
Tut las persunas che vivan en Svizra, las qualas na chattan betg pli ina confamigliara, in confamigliar u ina persuna che las stat datiers, pon sa drizzar al servetsch da retschertga da la Crusch Cotschna Svizra. Ellas survegnan ina cussegliaziun persunala ed infurmaziuns regularas davart il stadi da las retschertgas. Il servetsch da retschertga pon ins contactar sut il numer da telefon 058 400 43 80 u per e-mail tracing@redcross.ch
Via la pagina d'internet familylinks.icrc.org dal Comité internaziunal da la Crusch Cotschna pon ins era tschertgar online persunas sparidas. Vus pudais tschertgar Voss confamigliars e Vossas confamigliaras en ina situaziun da catastrofa acuta, consultar glistas da nums da persunas sparidas, guardar fotos da persunas en l'Europa che tschertgan lur confamigliars u laschar publitgar in'atgna foto, sche Vus tschertgais insatgi en l'Europa. La pagina d'internet stat a disposiziun en arab, englais, franzos e spagnol.
Jau vi inoltrar ina dumonda da survegnir ina permissiun per cas da direzza. Co stoss jau proceder?
La cumissiun per cas da direzza da l'Uffizi da migraziun e da dretg civil dal Grischun resguarda per dar ina permissiun B singuls aspects da l'integraziun sco era tut las circumstanzas da la vita.
Las directivas da la cumissiun per cas da direzza ed in fegl d'infurmaziun per inoltrar ina dumonda respectiva chattais Vus sin la pagina d'internet da l'Uffizi da migraziun e da dretg civil dal Grischun.
Nua datti agid, sche jau survegn brevs cun in cuntegn che jau na chapesch betg bain?
Dumandai per agid amias ed amis, enconuschentas ed enconuschents, persunas che fan lavur voluntara. Forsa pon era sa gidar vischinas e vischins. In'autra pussaivladad è da discutar ils documents cun collavuraturas e collavuraturs dals servetschs socials regiunals u da contactar il post spezialisà per l'integraziun.
Nua poss jau cumprar products dal diever quotidian bunmartgads?
Las butias da victualias fan adina puspè acziuns cun products a pretschs reducids. Savens pon ins cumprar tals products la saira avant che la butia serra, perquai ch'ils products scadan prest. I dat però era dis d'acziun che sa repetan regularmain.
Persunas cun pitschnas entradas che vivan a Cuira ubain a Domat pon far cumissiuns en il martgà da la Caritas a la Tittwiesenstrasse 27 a Cuira. Il sortiment cumpiglia aliments da basa, products frestgs, artitgels d'igiena e tut ils products impurtants dal basegn quotidian. Contactai per ulteriuras dumondas la Caritas Grischun.
Dastgan fugitivas e fugitivs ir a star en in auter chantun?
La pussaivladad da midar il chantun è dependenta dal status da dimora sco era d'auters facturs. Sin la pagina d'internet da l'Agid svizzer als fugitivs chattais Vus ina survista dals attests da dretg d'asil e dals pli impurtants dretgs tenor il status.
Tgi paja mia vestgadira da lavur, il material da scola u il laptop durant mes emprendissadi?
La vestgadira da lavur metta a disposiziun il manaschi d'emprendissadi. Sche la professiun pretenda ultra da quai chalzers spezials, sto l'emprendista u l'emprendist procurar per quels. Il material da scola paja medemamain l'emprendista u l'emprendist. Mintgatant sa participescha la patruna u il patrun a quests custs. Il laptop cumpra l'emprendista u l'emprendist. In sustegn finanzial sto vegnir discutà cun la collavuratura responsabla u il collavuratur responsabel dal servetsch social regiunal resp. da l'Uffizi da migraziun e da dretg civil.
Co poss jau spargnar daners cun allontanar rument?
En general vala en Svizra il princip dal chaschunader. Tgi che chaschuna rument, sto pajar per quel. Per quest motiv pretendan bleras vischnancas taxas per satgs da rument. Sche Vus separais Voss rument avant ch'al allontanar, duvrais Vus damain satgs da rument e pudais damai spargnar daners.
Tge rument che vegn rimnà tar Vus a chasa e tgenin che Vus stuais purtar sezza/sez als lieus da rimnada publics, vegnis Vus a savair da Vossa vischnanca.