Savida da basa
Qua chattais Vus ina schelta d’infurmaziuns da basa utilas.
Nua chat jau infurmaziuns davart la procedura d’asil?
Il Secretariat da stadi per la migraziun (SEM) è responsabel per la realisaziun da las proceduras d’asil. Sin sia pagina-web chattais Vus decleraziuns sistematicas davart il process d’asil en Svizra, tranter auter davart ils suandants puncts:
-
da la dumonda d’asil a la strategia da tractament dal SEM;
-
la repartiziun da las requirentas e dals requirents d’asil sin las regiuns d’asil e l’accoglientscha en ils centers d’asil federals cun funcziun da procedura;
- la procedura da Dublin;
- las proceduras naziunalas e las proceduras spezialas;
- il tractament da persunas minorennas betg accumpagnadas che tschertgan asil u da persunas senza naziunalitad.
Infurmaziuns e decleraziuns davart la procedura d’asil chattais Vus era sin la pagina-web da l’Agid svizzer a fugitivas e fugitivs.
Tge signifitgan ils differents status da dimora?
Il status giuridic ch’ina persuna survegn po esser different tut tenor la decisiun d’asil. Il status giuridic è collià cun ils dretgs correspundents. La pagina d’internet da l’Agid svizzer a fugitivas e fugitivs porscha ina survista dals documents dal dretg d’asil e dals dretgs da status ils pli impurtants, tranter auter quai che pertutga la reuniun da la famiglia, la midada dal chantun, la lavur, l’agid social u viadis a l’exteriur.
Co èn regladas las cumpetenzas per persunas dal sectur d’asil e da fugitivas e fugitivas en il chantun Grischun?
Tut tenor il status da dimora valan differentas cumpetenzas concernent il sustegn da persunas dal sectur d’asil e da fugitivas e fugitivs. Qua chattais Vus ina curta survista:
Requirentas e requirents d’asil
Per requirentas e requirents d’asil en la procedura pendenta è cumpetenta la partiziun Asil e return da l’Uffizi da migraziun e da dretg civil dal Grischun. Infurmaziuns detagliadas chattas Vus qua:
Persunas admessas provisoricamain
Per persunas ch’èn admessas provisoricamain e che sa chattan dapi main che set onns en Svizra è cumpetenta la partiziun Asil e return da l’Uffizi da migraziun e da dretg civil dal Grischun.
Per persunas ch’èn admessas provisoricamain e che sa chattan en Svizra dapi passa set onns èn cumpetentas las vischnancas da domicil. L’assistenza surpiglian ils servetschs socials regiunals.
La cumpetenza per l’integraziun linguistica, sociala e professiunala ha il Post spezialisà per l'integraziun da l’Uffizi da migraziun e da dretg civil dal Grischun.
Fugitivas e fugitivs renconuschids
Per fugitivas e fugitivs renconuschids èn cumpetentas las vischnancas da domicil. L’assistenza surpiglian ils servetschs socials regiunals.
La cumpetenza per l’integraziun linguistica, sociala e professiunala ha il Post spezialisà per l’integraziun da l’Uffizi da migraziun e da dretg civil dal Grischun.
Fugitivas e fugitivs admess provisoricamain
Per fugitivas e fugitivs ch’èn admess provisoricamain èn cumpetentas las vischnancas da domicil. L’assistenza surpiglian ils servetschs socials regiunals.
La cumpetenza per l’integraziun linguistica, sociala e professiunala ha il Post spezialisà per l’integraziun da l’Uffizi da migraziun e da dretg civil dal Grischun.
Nua poss jau m’infurmar davart ils pajais d’origin da fugitivas e fugitivs?
Per la lavur voluntara cun fugitivas e fugitivs poi esser nizzaivel da savair dapli davart lur pajais d’origin. Per chapir meglier la situaziun da la persuna fugida gidi per exempel da savair las respostas a las suandantas dumondas: Co è la situaziun politica ed economica? Co è la situaziun dals dretgs umans? Tge capita cun ils adversaris dal reschim u cun persunas che refusan da far servetsch militar? Tge è la posiziun sociala da minoritads etnicas u religiusas?
Differentas organisaziuns porschan infurmaziuns davart ils pajais sin lur pagina-web. Ina schelta chattais Vus qua: