Il success economic stat normalmain en il center da l'activitad d'interpresa. Facturs sco il bainesser general da las collavuraturas ed ils collavuraturs, lur tractament egual sco er ina cultura d'interpresa averta giogan ina rolla impurtanta per il success dal manaschi. Qua chattais Vus differents tips, co che l'integraziun da collavuraturas fugitivas e da collavuraturs fugitivs po reussir a la plazza da lavur.

Chapientscha linguistica

Ina buna chapientscha linguistica a la plazza da lavur ha blers effects positivs. Ella reducescha malchapientschas, promova in'atmosfera da team constructiva e contribuescha a l'optimaziun dals process. Qua chattais Vus ideas e propostas, co che Vus pudais promover las cumpetenzas linguisticas da Vossas collavuraturas e Voss collavuraturs da lingua estra en il mintgadi da lavur:

• Erui quant bain che las novas collavuraturas ed ils novs collavuraturs enconuschan la lingua locala tant a bucca sco er en scrit. Faschai la segira che las infurmaziuns vegnian chapidas e dumandai sistematicamain, sche Vus avais dubis.
• Encuraschai la collavuratura u il collavuratur da dumandar sezza u sez, sch'ella u el n'ha betg chapì insatge.
• Surdai il mument da l'entrada en plazza ina mappa da bainvegni cun las infurmaziuns davart il manaschi, davart las assicuranzas socialas, davart la taglia a la funtauna, davart las prescripziuns da segirezza e.u.v.
• Mettai a disposiziun a la collavuratura u al collavuratur in padrin u ina madritscha per la fasa d'introducziun.
• Laschai eventualmain far glistas cun las translaziuns da las frasas e dals terms specifics che vegnan duvrads savens en il manaschi.
Curs da lingua a l'intern dal manaschi èn ina buna pussaivladad per prestar ina promoziun linguistica adattada a Voss manaschi. Sche Vus avais interess, contactai per plaschair il Post spezialisà per l'integraziun.

Scolaziun e furmaziun supplementara, qualificaziun

Collavuraturas e collavuraturs bain scolads e qualifitgads èn ina resursa impurtanta per Vossa interpresa. Faschai diever da las pussaivladads da scolaziun e da furmaziun supplementara da Vossas collavuraturas e Voss collavuraturs e prestai uschia ina contribuziun a lur integraziun persistenta en il mund da lavur.

• Dispona Vossa collavuratura u Voss collavuratur d'in diplom ester? Infurmai ella u el davart il post da contact naziunal tar il Secretariat da stadi per furmaziun, retschertga ed innovaziun (SEFRI). Quest post serva sco emprim post da consultaziun per dumondas generalas en connex cun la renconuschientscha da diploms esters.
  
  Dapli infurmaziuns: Post da contact naziunal tar il SEFRI (DE)
• Infurmai Vossa collavuratura u Voss collavuratur davart la pussaivladad d'obtegnair in diplom professiunal renconuschì. Per quest intent datti differentas vias. Recumandai in discurs da cussegliaziun en in center d'infurmaziun professiunala (CIP) per chattar or, tge via ch'è la pli adattada.
  
  Dapli infurmaziuns: Uffizi per la furmaziun professiunala / fegl d'infurmaziun "Drei Wege zum Berufsabschluss für Erwachsene"
• Discurri cun Vossa collavuratura u Voss collavuratur davart ses basegn da furmaziun supplementara e defini las cundiziuns per ina furmaziun professiunala supplementara.
• Persunas creschidas che prendan en mira in diplom professiunal u absolvan ina furmaziun supplementara, èn dependentas da cundiziuns da basa correspundentas. Sustegnai Vossa collavuratura u Voss collavuratur per exempel cun ina planisaziun da la lavur che pussibilitescha ad ella u el da frequentar ina scola u in curs.

Tractament egual

Il tractament egual da collavuraturas e collavuraturs, independentamain da l'origin, da la lingua, da la religiun u d'auters criteris, contribuescha ad in clima da lavur positiv e promova la productivitad da l'interpresa. Cun tge mesiras che Vus prevegnis en Voss manaschi a la discriminaziun da collavuraturas e collavuraturs immigrads, vegnis Vus a savair qua:

• Prescripziuns da salari fixas en las descripziuns da las plazzas promovan l'egualitad da las pajas e procuran per pli pauca discussiun davart l'autezza da la paja adattada.
• Garanti a tut las persunas l'egualitad da las schanzas per l'access ad ina scolaziun ed ad ina furmaziun supplementara.
• Explitgai en cas da remartgas rassisticas – er sch'ellas èn manegiadas sco sgnoccas – ch'ellas na vegnan betg toleradas en il manaschi. Elavurai eventualmain in codex da conduita cunter rassissem e cunter discriminaziun e defini sancziuns en cas da cuntravenziuns cunter quel.
• Prendai serius reclamaziuns da collavuraturas e collavuraturs che sa sentan discriminads. Ultra da discriminaziun rassistica tutgan stress, mobing, mulesta sexuala u violenza tar las ristgas psicosocialas e pon avair consequenzas gravantas per las persunas pertutgadas. Da quai patescha er il success da Voss manaschi.
• As drizzai per cussegliaziun e per sustegn en dumondas en connex cun il tema rassissem e discriminaziun a la plazza da lavur al Post da cussegliaziun cunter rassissem.
  
  Dapli infurmaziuns: Post da cussegliaziun cunter rassissem en il chantun Grischun