Nundumbraivlas interpresas pitschnas, mesaunas e grondas sco er instituziuns en il Grischun èn prontas da promover il potenzial professiunal d'umans che derivan d'in auter ambient cultural e da sa laschar involver en in process d'integraziun professiunal cuminaivel. Qua rapportan patrunas e patruns da la rolla che giogan las coachas ed ils coachs da lavur, da las schanzas che sa porschan ad interpresas che engaschan in uman cun ina biografia da migraziun e co ch'ins po surmuntar obstachels linguistics.
Urs Manetsch, manader da la centrala da distribuziun – Coop, Cuira
«Grazia al Chantun na generescha il praticum nagins custs da paja»
Las bunas experientschas motiveschan nus il pli fitg. Bler dapli che 90 pertschient da las praticantas e dals praticants èn fitg fidabels, punctuals e lavuran bain. Sche nus avain ina plazza libra, l'occupain nus perquai gugent cun in dad els. Il praticum na generescha grazia al Chantun gea nagins custs da paja ed è perquai pir da dretg in'occasiun singulara per emprender d'enconuscher ils umans e lur abilitads. Sa chapescha datti mintgatant obstachels ch'èn da superar. Per exempel sch'insatgi ha fadias d'acceptar critica. Tant pli hai jau plaschair, sche quella persuna surpiglia in pau a la giada adina dapli responsabladad a la lavur ed era per sasezza.
Stefan Meury, manader dal center – Prevost, center da mastergn e d'atschal, Tusaun
«Ils jobcoaches ans distgargian dal ballast administrativ e fan punts»
Il sustegn dals jobcoaches è ina gronda motivaziun per nus. Els ans distgargian dal ballast administrativ e fan punts, là nua ch'igl è necessari. Per exempel en connex cun analisas da la situaziun ch'èn decisivas per l'entir process da l'integraziun en il mund da lavur. Las fugitivas ed ils fugitivs èn fitg lavurus ed èn per regla engraziaivels per las pussaivladads che noss manaschis porschan ad els. Dus giuvens absolvan entant schizunt in emprendissadi tar nus e quatter han survegnì in engaschament fix suenter il praticum. Jau sai mez strusch pli crair che jau era sceptic a l'entschatta avant quatter onns …
Urs Hardegger, manader da l'instituziun – Stiftung am Rhein, Maiavilla (centers da tgira Senesca e Neugut ed Ospizi grischun)
«Jau hai plaschair, sche las dunnas ed ils umens van lur via.»
Gidar empè da sa vilentar è mia devisa. Per che l'integraziun funcziunia dovran fugitivas e fugitivs era schanzas. Quellas purschain nus cun praticums e per part era cun plazzas d'emprendissadi. Jau hai plaschair da vesair co che las dunnas ed ils umens van pass per pass lur via. In bel effect secundar è natiralmain che nus pudain uschia era scolar e gudagnar ina nova generaziun da persunal da tgira ch'è fitg dumandà. Nus essan engraziaivels per il sustegn dals jobcoaches dal Post spezialisà per l'integraziun. Els èn orientads a soluziuns e fitg premurads da betg laschar far naufragi in engaschament, per exempel pervia d'obstachels birocratics.
Daniel Hossmann, manader dal sectur alimentaziun – Uffizi per la furmaziun media-superiura, manaschi d'abitar e d'alimentaziun, Cuira
«Nus savain ch'ins sto l'emprim s'endisar a bler»
Nus ans engaschain dapi blers onns cun plazzas da praticum en nossa cuschina gronda. Deplorablamain n'avain nus a blers betg pudì porscher ina soluziun da cuntinuaziun. Dacurt hai jau puspè stuì laschar ir in fitg bun um da prest 60 onns. En la gastronomia è il corset finanzial fitg stretg. Tant pli bel èsi, sch'il grond engaschi tar nus avra las portas per in'autra plazza. E sch'insatge n'avess ina giada betg dad ir a moda ideala, è il team indulgent. In pèr collavuraturas e collavuraturs han sezs ina biografia da migraziun e san ch'ins sto l'emprim s'endisar a bler.
Arno Theus, mainafatschenta – Carosserie Theus AG, Cuira
«Obstachels linguistics pon ins superar»
Tgi che va a prà cun noss team è bainvegnì. Nus essan ina squadra giuvna ed averta, quai va fitg bain. Ina gronda sfida è la lingua. Ins sto emprender terms tecnics. Pir da dretg, sch'ins vul far in emprendissadi, quai che fan tar nus per il mument dus umens da la Siria. Obstachels linguistics pon ins però superar. Cun differentas linguas essan nus numnadamain disads en Svizra e cunzunt en il Grischun, nua ch'èn represchentadas trais da quatter linguas naziunalas. Era per in collavuratur d'ina vallada dal sid poi esser ina sfida supplementara da communitgar a moda clera.
Nus essan optimistics, avain fidanza en noss collavuraturs e ristgain magari er insatge. Fin oz hai adina valì la paina.
Susann Wittwer, mainafatschenta – Tertianum Casa Fiora, center da dimora e da tgira, Zizers
«Las senioras ed ils seniors han reagì a moda sensaziunala»
A l'entschatta hai jau fatg quitads, schebain era las senioras ed ils seniors sustegnian noss engaschament. Els han reagì a moda sensaziunala. La sceptica ch'ins ha sentì l'emprim tscha e là è sparida, cura ch'ins ha emprendì d'enconuscher in l'auter meglier. La lavur na gida gea betg mo a cuntanscher l'independenza finanziala, mabain er a crear contacts socials. Nus contribuin qua gugent nossa part e profitain persuenter d'in grondius sustegn. Sch'ina persuna n'è, malgrà la bainvulientscha, betg fatga per noss champ professiunal, communitgain nus quai avertamain ensemen cun ils jobcoaches. Nus avain però gia dastgà ans legrar da baininqual success.
Heinz Zogg, possessur e mainafatschenta – Rv - Energietechnik AG, Maiavilla
«Nus avain gudagnà grondius umans per noss team»
En nossa branscha n'èsi nagut da nov da lavurar ensemen cun persunas da lingua estra. Dapi 15 onns emploiain nus collavuraturas e collavuraturs da differentas naziunalitads e biografias. Perquai hai jau ditg a mamez: pir che dar en venter na poss jau betg. Ed jau na sun mai m'enriclà. Grazia al process da plirs stgalims accumpagnà dals jobcoaches s'approximesch'ins gea successivamain. Nus avain en mintga cas gudagnà grondius umans per noss team. In pèr han bain survegnì l'ina u l'autra gia egliadas criticas da clientas e clients, ma suenter che quels han vis lur buna lavur – u era mo che «quels» tiran er or ils chalzers a l'entrada – han els spert midà idea …