Tschertgais Vus infurmaziuns uffizialas da las autoritads u vulessas Vus dar infurmaziuns davart la vita en Svizra a fugitivas e fugitivs? Qua chattais Vus colliaziuns nizzaivlas.
Il portal per burgaisas e burgais ch.ch porscha respostas bain chapiblas a dumondas che vegnan savens fatgas a las autoritads. Il spectrum tematic è vast e tanscha dad A per abitar sur F per famiglia ed L per lavur fin tar V per votaziuns ed elecziuns.
En la broschura da bainvegni dal chantun Grischun chattais Vus bleras infurmaziuns utilas davart temas sco la communicaziun, la lavur, la famiglia, ils uffants, la scola, l’abitar, la sanadad, las assicuranzas, la mobilitad u l’ambient. Ultra da quai cuntegna la broschura ina glista da purschidas da cussegliaziun e sustegn. La broschura datti en 19 linguas.
Bleras infurmaziuns nizzaivlas davart il mintgadi en il Grischun e davart la vita en Svizra chattais Vus era sin la pagina d’internet hallo.gr.ch. Las infurmaziuns stattan a disposiziun en albanais, arab, bosniac/croat/serb, dari/farsi, tudestg, englais, franzos, talian, portugais, rumantsch, spagnol, tamil e tigrinya.
La pussaivladad dad ir en in auter chantun dependa dal status da dimora sco era dad auters facturs. Sin la pagina-web da l’Agid svizzer a fugitivas e fugitivs chattais Vus ina survista dals documents dal dretg d’asil e dals dretgs da status ils pli impurtants.
Butias e negozis da victualias fan adina puspè acziuns e vendan mangiativas pli bunmartgà. Il pli savens datti pretschs reducids la saira per evitar che la butia u il negozi stoppia bittar davent products che scadessan prest. I dat però era dis d’acziuns che han adina puspè lieu.
Per persunas che vivan a Cuira u a Domat ed han paucas entradas datti la pussaivladad da far cumissiuns tar la Caritas a la Tittwiesenstrasse 27, Cuira. Il sortiment cumpiglia victualias da basa, products frestgs, artitgels d’igiena e tut ils products impurtants dal basegn quotidian. Ulteriuras infurmaziuns dat la Caritas dal Grischun.